សិង្ហបុរី៖ កីឡាករជម្រើសជាតិសិង្ហបុរី Ilhan Fandi បានសម្រេចកិច្ចព្រមព្រៀងផ្ទេរទៅកាន់ក្លិប KMSK Deinze​ នៅក្នុងក្របខណ្ឌលីគទីពីរប៊ែលហ្សិក ក្រោយពីជួយក្រុម Albirex Niigata Singapore គ្រងជើងឯកលីគកំពូលសិង្ហបុរីរដូវកាល ២០២២នេះ។ នេះបើតាមការប្រកាសជាផ្លូវការរវាងភាគីក្លិបទាំងពីរ។

ក្លិប KMSK Deinze បញ្ជាក់ថា កីឡាករវ័យ២០ឆ្នាំខាងលើ នឹងបង្ហាញខ្លួនជាមួយក្លិននៅក្នុងការប្រកួតក្របខណ្ឌលីគទី២ ដែលនឹងចាប់ផ្តើមពីខែមករានេះតទៅ។ 

គួរបញ្ជាក់ថា Ilhan Fandi គឺជាកូនទី៣ របស់វីរបុរសបាល់ទាត់សិង្ហបុរី លោក Fandi Ahmad។ ថ្មីៗនេះ Ilhan ទើបតែបានទទួលពានរង្វាន់ជាកីឡាករវ័យក្មេងឆ្នើមបំផុតប្រចាំឆ្នាំរបស់សិង្ហបុរី (AIA Young Player of the Year) ពីសហព័ន្ធកីឡាបាល់ទាត់សិង្ហបុរី។ ក្រៅពីពានរង្វាន់កីឡាករវ័យក្មេងឆ្នើមបំផុតប្រចាំឆ្នាំ Ilhan ក៏ឈ្នះពានគ្រាប់បាល់ល្អបំផុតប្រចាំរដូវកាលផងដែរ។ 

Ilhan Fandi បច្ចុប្បន្នមានវ័យ ២០ឆ្នាំ ផ្ទេរមកកាន់ក្លិប Albirex Niigata ពីក្លិប Young Lions ដែលជាក្លិបថ្នាលយុវជនរបស់សិង្ហបុរី កាលពីខែមេសាកន្លងទៅ និងបានបង្ហាញខ្លួនស្ទើរគ្រប់ការប្រកួតជាមួយក្លិប។ គេរកបាន ១៧គ្រាប់ជួយឱ្យក្លិបគ្រងជើងឯកលីគ និងបង្ហាញខ្លួនបាន ៤ប្រកួតជាមួយក្រុមជម្រើសជាតិសិង្ហបុរី។

គួរបញ្ជាក់ថា ក្លិបបាល់ទាត់ KMSK Deinze​ ជាក្លិបស្ថិតក្រោមការគ្រប់គ្រងរបស់ក្រុមហ៊ុនមានមូលដ្ឋាននៅសិង្ហបុរី ACA Football Partners។ បច្ចុប្បន្នក្លិបកំពុងឈរនៅចំំណាត់ថ្នាក់លេខ ៨ ក្នុងចំណោម ១២ក្លិប ខណៈរដូវកាលមុនបញ្ចប់នៅចំណាត់ថ្នាក់លេខ ៤៕